अनकढाळ सरपंचपदासाठी थेट जनतेतून लढत; एप्रिल अखेरीस मतदान

अनकढाळ सरपंचपदासाठी थेट जनतेतून लढत; एप्रिल अखेरीस मतदान

सांगोला तालुक्यात राजकीय रणधुमाळीला सुरुवात, ६७ ग्रामपंचायतींच्या निवडणुकीसाठी हालचालींना वेग

सांगोला (प्रतिनिधी): सांगोला तालुक्यातील ग्रामपंचायत राजकारणाने अचानक वेग घेतला असून अनकढाळ ग्रामपंचायतीच्या सरपंचाने दिलेल्या राजीनाम्यानंतर तसेच चिणके प्रभाग-३, चिकमहूद व खवासपूर येथील सदस्यांच्या जागा रिक्त झाल्यामुळे तालुक्यात निवडणुकीची धामधूम सुरू झाली आहे. विशेष म्हणजे अनकढाळ येथील सरपंचपदाची निवडणूक थेट जनतेतून होणार असल्याने ही लढत प्रतिष्ठेची ठरणार असून गावपातळीवर राजकीय हालचालींना वेग आला आहे.

राजीनामे आणि मृत्यूमुळे निर्माण झालेल्या रिक्त जागांमुळे निवडणूक अपरिहार्य ठरली असून याच पार्श्वभूमीवर १७ मार्च २०२६ रोजी निवडणूक कार्यक्रम जाहीर करण्यात आला. या घोषणेनंतर गावोगावी राजकीय समीकरणे बदलू लागली आहेत. विविध पक्षांचे स्थानिक नेते, माजी पदाधिकारी, इच्छुक उमेदवार आणि कार्यकर्ते यांनी मोर्चेबांधणी सुरू केली आहे. गट-तट सक्रिय झाले असून अनेक ठिकाणी उमेदवारीसाठी चढाओढ सुरू आहे.

निवडणूक कार्यक्रम: 
निवडणूक आयोगाने जाहीर केलेल्या कार्यक्रमानुसार—
नामनिर्देशन अर्ज दाखल: ७ एप्रिल ते १३ एप्रिल (सकाळी ११ ते दुपारी ३)
अर्जांची छाननी: १५ एप्रिल (सकाळी ११ पासून)
माघार घेण्याची अंतिम मुदत: १७ एप्रिल (दुपारी ३ पर्यंत)
चिन्ह वाटप: १७ एप्रिल
मतदान: २८ एप्रिल (सकाळी ७:३० ते सायंकाळी ५:३०)
मतमोजणी: २९ एप्रिल

या कालावधीत सांगोला तालुक्यातील राजकीय वातावरण अधिकच तापणार असून प्रचाराचा शिगेला पोहोचणारा टप्पा एप्रिलच्या तिसऱ्या आठवड्यानंतर दिसणार आहे.
अनकढाळ ग्रामपंचायतीच्या सरपंचपदाची निवडणूक थेट जनतेतून होत असल्याने ही लढत तालुक्याच्या राजकारणाचे केंद्रबिंदू ठरणार आहे. गावातील विकासकामे, पाणीप्रश्न, रस्ते, शासकीय योजना आणि स्थानिक गटबाजी यावरून प्रचार रंगणार असल्याचे संकेत आहेत. यामुळे पारंपरिक गटांबरोबरच नव्या चेहऱ्यांनाही संधी मिळण्याची शक्यता वर्तवली जात आहे.

चिणके प्रभाग-३ मधील सदस्याच्या राजीनाम्यामुळे तसेच चिकमहूद आणि खवासपूर येथील सदस्यांच्या निधनामुळे प्रत्येकी एक जागा रिक्त झाली आहे. या तिन्ही ठिकाणी प्रतिष्ठेची लढत होण्याची शक्यता आहे.

६२ ग्रामपंचायतींसाठी मोठा कार्यक्रम लवकरच
तालुक्यातील मुदत संपलेल्या ६२ ग्रामपंचायतींच्या प्रारूप प्रभाग रचनेची प्रक्रिया पूर्ण झाली आहे. या रचनेवर ४ एप्रिल ते १३ एप्रिल दरम्यान हरकती नोंदविण्याची मुदत देण्यात आली आहे. हरकती प्राप्त झाल्यास तहसीलदारांसमोर सुनावणी होऊन त्यावर निर्णय घेतला जाणार आहे. त्यानंतर अंतिम प्रभाग रचना प्रसिद्ध केली जाईल आणि त्यानंतरच मोठ्या निवडणूक कार्यक्रमाची घोषणा होणार आहे. बागलवाडी, गळवेवाडी, राजापूर, सोनलवाडी आणि सोनंद या पाच ग्रामपंचायतींची प्रभाग रचना २०२४ मध्येच झाल्यामुळे या ग्रामपंचायतींच्या निवडणुकाही ६२ ग्रामपंचायतींसोबतच घेण्यात येणार आहेत. त्यामुळे एकूणच सांगोला तालुक्यात ६७ ग्रामपंचायतींमध्ये निवडणुकीची रणधुमाळी पाहायला मिळणार आहे.
निवडणूक सुरळीत पार पडावी यासाठी तहसीलदार श्रीमती बाळूताई भागवत यांनी दोन निवडणूक निर्णय अधिकारी आणि चार सहाय्यक निर्णय अधिकाऱ्यांची नियुक्ती केली आहे. निवडणूक प्रक्रिया पारदर्शक व शांततेत पार पाडण्यासाठी प्रशासनाकडून आवश्यक ती सर्व तयारी सुरू करण्यात आली आहे.

या निवडणुकांमुळे तालुक्यातील स्थानिक राजकारणात मोठे बदल होण्याची शक्यता आहे. काही ठिकाणी जुने गट तुटून नवे समीकरण तयार होताना दिसत आहेत, तर काही गावांमध्ये युवा नेतृत्व पुढे येत आहे. सरपंचपदाच्या थेट निवडणुकीमुळे मतदारांचा थेट सहभाग वाढणार असून ही निवडणूक आगामी मोठ्या राजकारणासाठीही दिशा ठरवणारी ठरणार आहे. गावोगावी सभा, प्रचार, गटबाजी आणि आरोप-प्रत्यारोप यामुळे राजकीय वातावरण चांगलेच ढवळून निघणार असून “जनतेचा कौल” कोणाच्या बाजूने झुकतो, याकडे सर्वांचे लक्ष लागले आहे.