भाजपची राजकीय ‘गुगली’ यशस्वी; शेकापचा उमेदवार कमळाच्या दारी

भाजपची राजकीय ‘गुगली’ यशस्वी; शेकापचा उमेदवार कमळाच्या दारी

पालकमंत्री जयकुमार गोरे यांच्या ‘गुगली’ने सांगोल्याच्या राजकारणात भूकंप!

सांगोला (प्रतिनिधी) : सांगोला नगरपालिकेच्या निवडणुकीचा माहोल दिवसेंदिवस तापत असताना, पालकमंत्री जयकुमार गोरे यांनी टाकलेली राजकीय ‘गुगली’ तालुक्यातील संपूर्ण समीकरणे बदलू लागली आहेत. पालकमंत्री जयकुमार गोरे यांच्या अचूक टायमिंगच्या ‘गुगली’ने सांगोला तालुक्यात अक्षरशः खळबळ उडाली आहे. “जिल्ह्यातील सर्व नगराध्यक्ष पदाचे उमेदवार कमळ चिन्हावरच निवडणूक लढवतील,” या त्यांच्या जाहीर घोषणेमुळे प्रत्येक पक्षातील इच्छुकांची धावपळ वाढली असून, राजकीय मैदानात अभूतपूर्व उलथापालथ सुरू झाली आहे. शेतकरी कामगार पक्षाचे नगराध्यक्ष पदाचे उमेदवार मारुतीआबा बनकर यांनी सोमवारी पालकमंत्री जयकुमार गोरे यांच्या उपस्थितीत भाजपमध्ये प्रवेश केला.

🔸 भाजपचा मास्टरस्ट्रोक — शेकापचा उमेदवार गळाला

शेकापचे नगराध्यक्षपदाचे उमेदवार मारुतीआबा बनकर यांनी थेट भाजपमध्ये प्रवेश करून सर्वांना धक्का दिला. पालकमंत्री जयकुमार गोरे आणि भाजप जिल्हाध्यक्ष चेतनसिंह केदार सावंत यांच्या उपस्थितीत झालेल्या या प्रवेशामुळे सांगोला राजकारणात खळबळ उडाली आहे. भाजपने स्थानिक स्तरावर नगराध्यक्षपदाची बाजू मजबूत करण्यासाठी ही ‘विकेट’ काढल्याचे स्पष्ट होत आहे.

🔸 काहींचे ‘कन्फर्म तिकीट’ स्वप्न धुळीस मिळाले

गेल्या काही दिवसांपासून भाजपमध्येच उमेदवारी मिळवण्यासाठी धडपड करणाऱ्यांचे प्रयत्नही आता प्रश्नचिन्हाखाली आले आहेत. ज्येष्ठ नेत्यांसाठी भाजप प्रवेशाची अट समोर ठेवल्यानंतर, त्यांना भूमिका, तत्त्व, ध्येय-धोरणे बाजूला ठेवावी लागतील, अशी परिस्थिती निर्माण झाली होती. त्यामुळे अशा काही इच्छुकांची उमेदवारी आता अनिश्चित झाली आहे.

विचारधारा गुंडाळून आश्रय शोधण्याची चढाओढ

निवडणूक जाहीर होताच सांगोल्यातील राजकीय हालचालींना मिनिटागणिक वेग आला आहे. भाजपसोबत युती साधून नगराध्यक्षपद ‘सेफ’ करण्यासाठी अनेक नेत्यांनी विचारधारा आणि जुन्या भूमिका बाजूला सारून नव्या समीकरणांच्या शोधात धावपळ सुरू केली आहे.