सांगोला (प्रतिनिधी): सामाजिक बांधिलकी जपत सातत्याने कार्यरत असलेल्या आपुलकी प्रतिष्ठान या संस्थेला गुंफण अकादमी कराड यांच्या वतीने प्रदान करण्यात येणाऱ्या मानाच्या “गुंफण सामाजिक पुरस्काराने” सन्मानित करण्यात आले. पुणे येथे संपन्न झालेल्या २१ व्या गुंफण सद्भावना साहित्य संमेलनात हा सोहळा उत्साहात पार पडला.
साहित्य, सामाजिक, सांस्कृतिक, सहकार, उद्योग, शिक्षण अशा विविध क्षेत्रांतील उल्लेखनीय कार्याचा गौरव करण्याच्या उद्देशाने गुंफण अकादमीच्या वतीने दरवर्षी पुरस्कारांचे वितरण केले जाते. यंदाच्या सोहळ्यात आपुलकी प्रतिष्ठानच्या सामाजिक कार्याची दखल घेत पुरस्कार जाहीर करण्यात आला.
संमेलनाध्यक्ष गझलकार सुनंदा शेळके, भारती विद्यापीठ, पुणे चे सह-कार्यवाह डॉ. महादेव सगरे, तसेच सेवानिवृत्त जिल्हा न्यायाधीश सुनील वेदपाठक यांच्या हस्ते सन्मानचिन्ह, सन्मानपत्र, शाल व बुके देऊन आपुलकी प्रतिष्ठानच्या सदस्यांचा गौरव करण्यात आला. यावेळी ज्येष्ठ साहित्यिक डॉ. संजय बोरुडे, जेष्ठ ग्रामीण साहित्यिक बबन पोतदार, जयसिंग कळके, गुंफण अकादमीचे अध्यक्ष बसवेश्वर चेणगे, पत्रकार गजानन चेणगे आदी मान्यवर उपस्थित होते.
या प्रसंगी प्रतिष्ठानचे अध्यक्ष राजेंद्र यादव, सचिव संतोष महिमकर, प्रभाकर सरगर, अच्युत फुले, महादेव दिवटे, सुरेश चौगुले, अरविंद डोंबे, प्रा. बाळासाहेब शेंडे, विठ्ठल मल्टीस्टेटचे चेअरमन दीपक बंदरे, विश्वासराव पाटील, दत्तात्रय नवले, श्रीकांत देशपांडे, वसंत सुपेकर, प्रथमेश यादव, जितेंद्र बोत्रे, श्रीयश नवले आदी उपस्थित होते.
