सांगोला नगरपालिकेच्या रणभूमीवर काँग्रेसचा ‘एकला चलो रे’चा नारा! — अजयसिंह इंगवले
सांगोला नगरपालिकेच्या रणभूमीवर काँग्रेसचा ‘एकला चलो रे’चा नारा! — अजयसिंह इंगवले
सांगोला (प्रतिनिधी): सांगोला नगरपालिकेच्या निवडणुकीची रणधुमाळी शिगेला पोहोचत असताना, राजकीय पटलावर काँग्रेसने स्वतंत्र बिगुल वाजवला आहे. महाविकास आघाडीतले तणाव उघडकीस आणत, काँग्रेसने ‘स्वबळावर लढणार, जनतेसाठी लढणार!’ असा ठाम नारा देत ‘एकला चलो रे’ची भूमिका स्वीकारली आहे.
हा निर्णय जाहीर करताना काँग्रेसचे तालुकाध्यक्ष अजयसिंह इंगवले यांनी सांगितले की, काँग्रेस पक्ष नगराध्यक्षासह नगरसेवकांच्या सर्व २३ जागांवर उमेदवार उभे करणार असून, सांगोल्याच्या राजकारणात काँग्रेस पुन्हा एकदा आपले अस्तित्व प्रभावीपणे दाखवून देईल.
“सांगोल्यातील नागरिकांच्या प्रश्नांना न्याय मिळवण्यासाठी काँग्रेस मैदानात उतरते आहे. सत्ता, स्वार्थ किंवा सवलतींसाठी नव्हे; तर जनतेच्या हक्कासाठी आणि शहराच्या प्रामाणिक विकासासाठी आम्ही रिंगणात उतरत आहोत. कार्यकर्त्यांनी तळागाळात पोहोचून नागरिकांचा विश्वास संपादन करावा, कारण जनतेची साथ हेच काँग्रेसचे सर्वात मोठे बळ आहे.” त्यांनी स्पष्ट केले की, काँग्रेस पक्ष तरुणांना आणि महिलांना नेतृत्वाच्या संधी देत नव्या उर्जेने निवडणुकीत उतरला आहे. “निष्ठावान कार्यकर्त्यांना न्याय देऊन, संघटना मजबूत करण्यावर आम्ही लक्ष केंद्रित करत आहोत,” असेही इंगवले यांनी ठासून सांगितले.
⚡ महाविकास आघाडी तुटली का? काँग्रेसचा निर्णय चर्चेचा विषय
महाविकास आघाडीतील मित्रपक्ष स्वबळावर लढण्याच्या हालचालींमुळे आघाडीतील मतभेद स्पष्ट झाले आहेत. आता काँग्रेसनेही स्वतंत्र वाट निवडल्याने सांगोल्यातील राजकारणाला नवे वळण मिळाले आहे. भाजप, शेकाप, शिवसेना आणि राष्ट्रवादी काँग्रेस या पक्षांनी आधीच स्वबळाची घोषणा केली होती. त्यामुळे आगामी निवडणुकीत चुरशीची लढत रंगणार असल्याचे राजकीय जाणकारांचे मत आहे.
“जनतेला पारदर्शक, उत्तरदायी आणि जनहिताचा कारभार हवा आहे. हीच भावना ओळखून काँग्रेस सांगोल्यात नव्या जोमाने उभी राहते आहे,” असे ते म्हणाले. कार्यकर्त्यांमध्ये नवचैतन्य निर्माण झाले असून, काँग्रेसच्या घोषणेनंतर सांगोल्यातील राजकारणात नव्या चर्चांना उधाण आले आहे.
