🎯 पालकमंत्री जयकुमार गोरेंचा करिष्मा, दीपकआबांनी गेम फिरवला, शेकापची ५० वर्षाची सत्ता संपुष्टात

🎯 पालकमंत्री जयकुमार गोरेंचा करिष्मा, दीपकआबांनी गेम फिरवला, शेकापची ५० वर्षाची सत्ता संपुष्टात

पंचायत समितीवर भाजप शिवसेनेचा झेंडा, सभापतीपदी पुनम इंगवले, उपसभापती अजय सरगर विजयी

सांगोला (प्रतिनिधी): सांगोला तालुक्याच्या राजकारणात ऐतिहासिक उलथापालथ घडवत तब्बल पन्नास वर्षे अबाधित असलेली शेकापची सत्ता अखेर संपुष्टात आली असून पंचायत समितीवर पहिल्यांदाच भाजप-शिवसेनेचा झेंडा फडकला. या निवडणुकीत पालकमंत्री जयकुमार गोरे यांचा करिष्मा पाहायला मिळाला असून माजी आमदार दीपकआबा साळुंखे पाटील यांच्या गटातील तीन पंचायत समिती सदस्यांनी भाजपमध्ये प्रवेश केल्याने तालुक्याच्या राजकारणात मोठी खळबळ उडाली. दरम्यान, पंचायत समितीच्या सभापतीपदी भाजपच्या पुनम इंगवले तर उपसभापतीपदी शिवसेनेचे अजय सरगर यांची बहुमताने निवड झाली. दिपकआबांनी गेम फिरवल्याने गेल्या ५० वर्षापासूनची सांगोला पंचायत समितीवरील शेकापची ५० वर्षाची सत्ता संपुष्टात आली असून पहिल्यांदा भाजप आणि शिवसेनेने सत्ता स्थापन केली आहे.

पंचायत समितीच्या सभापती व उपसभापती निवडीसंदर्भात पंचायत समितीच्या कार्यालयात बैठक आयोजित करण्यात आली होती. यावेळी सभापती पदासाठी भाजपकडून पुनम इंगवले तर शेकापकडून काजल काशीद यांनी अर्ज दाखल केले. उपसभापती पदासाठी शिवसेनेकडून अजय सरगर तर शेकापकडून छाया कोळेकर यांनी अर्ज दाखल केले. यावेळी हात उंचावून मतदान घेण्यात आले. सभापती निवडीत भाजपच्या पुनम इंगवले यांना आठ तर शेकापच्या काजल काशीद सहा मते यांना मते मिळाली. उपसभापती पदाच्या निवडीत शिवसेनेचे अजय सरगर यांना आठ तर शेकापच्या छाया कोळेकर यांना सहा मते मिळाली. यांनतर सभापतीपदी भाजपच्या पुनम इंगवले व उपसभापतीपदी अजय सरगर यांची बहुमताने निवड झाल्याचे निवडणूक निर्णय अधिकारी तथा प्रांताधिकारी बी. आर.माळी, सहाय्यक निवडणूक निर्णय अधिकारी तथा गटविकास अधिकारी उमेशचंद्र कुलकर्णी यांनी जाहीर केले.

दरम्यान, सभापती व उपसभापती निवडीप्रसंगी पंचायत समितीचे सर्व सदस्य, सदस्या, माजी नगराध्यक्ष रफिक नदाफ, नगराध्यक्ष आनंदा माने, जिल्हा परिषद सदस्या शोभाताई खटकाळे, युवानेते सागर पाटील , सूरज पाटील, युवानेते यशराजे साळुंखे पाटील, उद्योजक बाळासाहेब आसबे, युवासेनेचे तालुका प्रमुख गुंडांदादा खटकाळे, युवानेते योगेशदादा खटकाळे, उपनगराध्यक्ष नितीन इंगोले, नगरसेवक सोमेश यावलकर, यांच्यासह भाजप, शिवसेनेचे पदाधिकारी, कार्यकर्ते उपस्थित होते.

जिल्हा परिषद पंचायत समितीची निवडणुक भाजपचे जिल्हाध्यक्ष चेतनसिंह केदार सावंत आणि शिवसेनेचे माजी आमदार शहाजीबापू पाटील यांनी एकत्रित लढली होती. तर आमदार डॉ. बाबासाहेब देशमुख यांनी माजी आमदार दीपकआबा साळुंखे यांच्यासोबत आघाडी करुन निवडणूक लढवली होती. यामध्ये शेकाप आघाडीने १४ पैकी नऊ जागा जिंकत बहुमत मिळविले होते. यामध्ये शेकापला सहा आणि दीपकआबा गटाला तीन जागा मिळाल्या होत्या. भाजपला एक आणि शिवसेनेनेने चार जागा जिंकल्या होत्या.

दरम्यान, पालकमंत्री जयकुमार गोरे यांनी ऑपरेशन लोटस यशस्वी करून दीपकआबा साळुंखे गटातील तीन पंचायत समिती सदस्यांनी थेट भाजपमध्ये प्रवेश केल्याने सांगोला पंचायत समितीवर भाजप शिवसेनेचे बहुमत झाले. गुरुवारी झालेल्या निवडीमध्ये भाजपमध्ये प्रवेश केलेल्या पुनम इंगवले यांची सभापतीपदी तर उपसभापतीपदी शिवसेनेचे अजय सरगर यांची निवड करण्यात आली. गेल्या ५० वर्षांपासून सांगोला पंचायत समितीवर शेकापची सत्ता राहिली आहे. ही सत्ता कायम ठेवण्यासाठी आमदार डॉ. बाबासाहेब देशमुख यांनी राजकीय समीकरणे जुळवण्याचे प्रयत्न केले. मात्र, यात त्यांना यश मिळाले नाही. माजी आमदार शहाजीबापू पाटील आणि भाजपचे जिल्हाध्यक्ष चेतनसिंह केदार सावंत हे महायुतीचा झेंडा पंचायत समितीवर फडकवण्यासाठी जोरदार हालचाली केल्या. त्यातच पालकमंत्री जयकुमार गोरे यांनी ऑपरेशन लोटस यशस्वी करून दीपकआबा गटातील तीन सदस्यांचा भाजपमध्ये प्रवेश घडवून आणला. विधानसभा निवडणुकीनंतर दीपकआबा साळुंखे पाटील हे तटस्थ भूमिकेत असून त्यांनी अद्याप कोणत्याही पक्षात अधिकृत प्रवेश केलेला नाही. मात्र दोन दिवसांपूर्वी घेतलेल्या प्रमुख पदाधिकाऱ्यांच्या बैठकीत “कार्यकर्त्यांना योग्य वाटेल तोच निर्णय घेतला जाईल” असे सांगत त्यांनी राजकीय उत्सुकता अधिक वाढवली. त्यातच त्यांनी राजकारणात कोणी कायमचा शत्रू नसतो आणि कोणी कायमचा मित्र नसतो, सत्तेसाठी तडजोडी कराव्याच लागतात, याची प्रचिती देऊन पंचायत समितीच्या तीन सदस्यांचा भाजपमध्ये प्रवेश करून शेकापच्या ५० वर्षाच्या सत्तेला सुरुंग लावला. दिपकआबा गटाच्या ३ सदस्यांनी महायुतीला साथ दिल्याने शेकापला सत्तेपासून दूर रहावे लागले आहे. यामुळे स्व.गणपतराव देशमुख यांनी पंचायत समितीवर ५० वर्षे अबाधित ठेवलेली सत्ता राखण्यास डॉ.बाबासाहेब देशमुख यांना अपयश आले आहे. दरम्यान सभापती व उपसभापती निवडीनंतर महायुतीच्या पदाधिकारी, कार्यकर्त्यांनी गुलालाची उधळण करीत फटाक्यांची आतिषबाजी केली.

मेडशिंगी गावाला दुसऱ्यांदा सभापतीपदाचा बहुमान..!

सांगोला पंचायत समितीच्या स्थापनेपूर्वी लोकल बोर्डावर तालुक्यातील कोळा येथील कै.बाबासाहेब यशवंतराव देशमुख व चिकमहूदचे कै.ईश्वरा बाळासाहेब पाटील हे सदस्य होते. त्यानंतर ऑगस्ट १९६२ साली पंचायत समिती स्थापना झाली. स्थापनेनंतर सन १९६२ साली पहिले सभापती म्हणून मेडशिंगी येथील काँग्रेसचे कै.संभाजीराव आनंदराव शेंडे यांना मान मिळाला होता. त्यानंतर सन १९७२ पासून ते २०२२ पर्यंत माजी आमदार स्व.गणपतराव देशमुख यांच्या मार्गदर्शनाखाली शेतकरी कामगार पक्षाची तब्बल ५० वर्षे सत्ता अबाधित राहिली. यामध्ये शेकापकडून कै.जगन्नाथराव लिगाडे सर्वाधिक काळ १७ वर्ष सभापती पदाची धुरा सांभाळली. तर ७ महिलांनाही सभापतीपदी नेतृत्व करण्याची संधी मिळाली आहे. त्यानंतर आता मेडशिंगी गावच्या पुनम इंगवले यांना सभापतीपदी काम करण्याची संधी मिळाली.