न्यायसेवेची दोन दशके, संसाराची एकवीस वर्षे… आणि त्याच दिवशी जिल्हा न्यायाधीशपदी पदोन्नती!

न्यायसेवेची दोन दशके, संसाराची एकवीस वर्षे… आणि त्याच दिवशी जिल्हा न्यायाधीशपदी पदोन्नती!

न्या. तेजवंतसिंघ संधू यांची समाजाप्रती कृतज्ञता; आपुलकी प्रतिष्ठानला ५१०० ची देणगी

सांगोला (प्रतिनिधी): न्यायव्यवस्थेतील प्रामाणिक, अभ्यासू आणि जनसामान्यांमध्ये विश्वासार्ह न्यायाधीश म्हणून ओळख असलेल्या न्या. तेजवंतसिंघ संधू यांच्या जीवनातील एक अनोखा आणि संस्मरणीय योगायोग नुकताच घडला आहे. एखाद्या व्यक्तीच्या आयुष्यात काही क्षण असे येतात की ते केवळ यशाचे नसतात, तर संघर्ष, समर्पण, कर्तव्यनिष्ठा आणि कुटुंबाच्या पाठबळाची साक्ष देणारे ठरतात. न्यायव्यवस्थेतील अशीच एक प्रेरणादायी घटना म्हणजे न्या. तेजवंतसिंघ संधू यांच्या जीवनातील सुवर्णक्षण.

न्यायालयीन सेवेला तब्बल २० वर्षे पूर्ण झाल्यानंतर, वैवाहिक जीवनाची २१ वर्षे पूर्ण झालेल्या त्याच शुभदिनी त्यांची जिल्हा न्यायाधीश पदावर पदोन्नती झाली. कर्तव्य आणि कुटुंब या दोन्ही आघाड्यांवर यशस्वी वाटचाल करणाऱ्या न्या. संधू यांच्या आयुष्यातील हा दुर्मिळ योगायोग अनेकांसाठी प्रेरणादायी ठरत आहे.

सांगोला येथे तीन वर्षे न्यायदानाचे कार्य करताना न्या. तेजवंतसिंघ संधू यांनी आपल्या न्यायनिष्ठ, अभ्यासू आणि संवेदनशील कार्यशैलीने नागरिकांच्या मनात विशेष स्थान निर्माण केले होते. त्यांच्या कार्यकाळात न्यायालयात आलेल्या प्रत्येक व्यक्तीला न्याय मिळावा, हीच भूमिका त्यांनी सातत्याने जपली. त्यामुळे सांगोल्यातील वकील, न्यायालयीन कर्मचारी आणि सर्वसामान्य नागरिकांमध्ये त्यांच्याविषयी आजही आदराची भावना कायम आहे.

यशाच्या या आनंददायी क्षणीही समाजाप्रती असलेली बांधिलकी जपत न्या. संधू यांनी आपुलकी प्रतिष्ठान, सांगोला यांच्या शैक्षणिक साहित्य भेट उपक्रमासाठी ५१०० ची देणगी देत सामाजिक उत्तरदायित्वाचे दर्शन घडविले. त्यांच्या या उदार योगदानामुळे गरजू विद्यार्थ्यांच्या शैक्षणिक गरजा पूर्ण करण्यासाठी मोठी मदत होणार असल्याची भावना आपुलकी प्रतिष्ठानचे अध्यक्ष राजेंद्र यादव यांनी व्यक्त केली. आपुलकी प्रतिष्ठानच्या वतीने न्या. संधू यांच्या न्यायालयीन सेवेला, सामाजिक जाणीवेला आणि पदोन्नतीला शुभेच्छा देताना त्यांच्या पुढील कारकिर्दीसाठी उज्ज्वल यशाच्या शुभेच्छा देण्यात आल्या.

समाजाभिमुख विचार आणि न्यायनिष्ठ कार्य यांचा सुंदर संगम असलेल्या न्या. तेजवंतसिंघ संधू यांचे कार्य अनेकांसाठी प्रेरणादायी ठरत आहे.”न्यायदानातील उल्लेखनीय योगदान, सामाजिक बांधिलकीची जपणूक आणि जिल्हा न्यायाधीशपदी झालेली पदोन्नती” यामुळे न्या. तेजवंतसिंघ संधू यांच्यावर सर्व स्तरांतून अभिनंदनाचा वर्षाव होत आहे. आजच्या काळात पद, प्रतिष्ठा आणि यश मिळाल्यानंतरही समाजाशी नाळ जोडून ठेवणारी माणसे दुर्मिळ होत चालली आहेत. अशा वेळी “न्यायासनावरील कर्तव्य आणि समाजाप्रती असलेली संवेदना” यांचा सुंदर संगम घडविणारे न्या. तेजवंतसिंघ संधू यांचे कार्य अनेकांसाठी प्रेरणेचा दीप ठरत आहे.