🔥”उन्हाच्या झळांनी वन्यजीव हैराण; वनविभागात प्राण्यांसाठी ४८ पाणवठ्यांची निर्मिती!”

🔥”उन्हाच्या झळांनी वन्यजीव हैराण; वनविभागात प्राण्यांसाठी ४८ पाणवठ्यांची निर्मिती!”

सांगोला (प्रतिनिधी): वाढत्या उन्हाच्या तीव्रतेमुळे सांगोला तालुक्यातील वनपरिक्षेत्रातील वन्यजीव अक्षरशः जीव मुठीत धरून जगत आहेत. उन्हाची तीव्रता वाढल्याने पाण्याच्या टंचाईचा गंभीर प्रश्न निर्माण झाला असून, वनविभागाने ४८ पाणवठ्यांची निर्मिती केली असल्याची माहिती वनपरिक्षेत्र अधिकारी सागर मगर यांनी दिली.

सांगोला तालुका नेहमी दुष्काळी समजला जात असून तालुक्यात वन्य पशु पक्षांची संख्या देखील मोठी आहे. उन्हाळ्याच्या दिवसांमध्ये कित्येक ठिकाणी पाण्याचा दुष्काळ असतो. अशावेळी पशु पक्षांना पाणी उपलब्ध करण्यासाठी वनविभाग नेहमीच पुढाकार घेत असतो. सध्या उन्हाळ्याचे दिवस सुरु झाले आहेत. कित्येक ठिकाणी पाण्याची टंचाई जाणवत असताना पशु पक्षांच्या पाण्याचा प्रश्न निर्माण झाला आहे. या पार्श्वभूमीवर सांगोला तालुक्यात अनेक ठिकाणी वनविभागाच्या वतीने कुत्रिम पाणवठे तयार करण्यात आले आहेत. हे पाणवठे ऐन उन्हाळ्यात पशु पक्षांसाठी वरदान ठरत आहेत.

सांगोला तालुक्यात तब्बल ६५०० हेक्टर क्षेत्रावर पसरलेल्या वनपरिक्षेत्रात लांडगा, कोल्हा, तरस, सांबर, हरिण, काळवीट यांसारख्या दुर्मिळ व महत्त्वाच्या प्रजातींचा वावर आहे. या प्राण्यांच्या अस्तित्वासाठी पाण्याची उपलब्धता अत्यंत गरजेची असताना, उन्हाच्या चटक्यांमुळे नैसर्गिक जलस्रोत आटत चालले आहेत. यावर तोडगा म्हणून वन विभागाने ४८ कृत्रिम पाणवठ्यांची निर्मिती केली असून, दर १५ दिवसांनी टँकरद्वारे पाणी सोडले जात आहे. मात्र, वाढत्या तापमानामुळे हे पाणी लवकर आटत असल्याने वन्यजीवांना पुरेसा दिलासा मिळत नसल्याचे चित्र आहे.

तालुक्यातील आलेगाव, अचकदाणी, कटफळ, महूद, राजुरी, हटकर मंगेवाडी या भागांमध्ये मोठ्या प्रमाणात वनक्षेत्र असून, येथे वन्यजीवांची संख्या लक्षणीय आहे. या संपूर्ण भागावर लक्ष ठेवण्यासाठी २२ वन कर्मचारी कार्यरत आहेत. दरम्यान, स्थानिक नागरिकांकडूनही चिंता व्यक्त होत असून,  “पाण्याअभावी वन्यजीव गावांकडे वळण्याची शक्यता वाढत आहे. वन विभागाने केलेल्या उपाययोजना स्तुत्य असल्या तरी, वाढत्या उष्णतेसमोर त्या अपुऱ्या ठरत आहेत. अधिक टँकर, कायमस्वरूपी जलस्रोत निर्माण, तसेच वन्यजीवांसाठी दीर्घकालीन नियोजनाची गरज आता प्रकर्षाने जाणवत आहे.