🔥 “तापमानाचा तडाखा, ऊसाच्या रसाचा दिलासा!” 🔥

🔥 “तापमानाचा तडाखा, ऊसाच्या रसाचा दिलासा!” 🔥

रसवंती गृहांवर होतेय गर्दी; रस्त्याच्या कडेला ऊस रस विक्रीतून संसाराला हातभार

सांगोला (प्रतिनिधी): मार्च महिन्यापासूनच अंगाची लाही लाही करणाऱ्या उन्हाने सांगोला तालुक्यात अक्षरशः धुमाकूळ घातला आहे. ग्रामीण आणि शहरी भागात तापमान झपाट्याने वाढत असून, नागरिकांचे दैनंदिन जीवनही त्यातून होरपळत आहे. मात्र, या तप्त उन्हात ‘ऊसाचा थंडगार रस’ हा जणू जीवनदायी ठरत असून नागरिकांना मोठा दिलासा देत आहे.

उन्हाची तीव्रता वाढत असली तरी कामानिमित्त घराबाहेर पडणे अपरिहार्य असल्याने नागरिक ‘गारवा’ शोधत आहेत. अशा परिस्थितीत ऊसाचा रस हा सर्वसामान्यांसाठी नैसर्गिक, स्वस्त आणि आरोग्यदायी पर्याय म्हणून समोर आला आहे. त्यामुळे सांगोला शहरासह तालुक्यातील गावागावांत रसवंती गृहांवर ग्राहकांची अक्षरशः झुंबड उडताना दिसत आहे. रस्त्याच्या कडेला उभारलेल्या छोट्या गाड्यांवर ऊस पिळण्याचे चरखे, त्याला जोडलेले पेट्रोल इंजिन, बाजूला रचलेले ग्लास आणि पाण्याच्या बाटल्या अशी साधी पण आकर्षक मांडणी ग्राहकांना खुणावत आहे.

केवळ तहान भागवणारे पेय न राहता ऊसाचा रस हा अनेक कुटुंबांच्या उदरनिर्वाहाचे साधन बनला आहे. दिवसभर कडक उन्हात उभे राहून हे विक्रेते आपल्या संसाराला हातभार लावताना दिसत आहेत. विशेष म्हणजे, ग्राहकांना आकर्षित करण्यासाठी काही व्यावसायिकांनी अनोखी शक्कल लढवली आहे. रसवंती गृहाबाहेर स्पीकरद्वारे घुंगरांचा आवाज सतत वाजवला जातो. हा आवाज ऐकूनच प्रवासी व नागरिकांना ‘इथे रस मिळतो’ याची जाणीव होत असून त्यांच्या पावलं आपसूकच त्या दिशेने वळत आहेत.

ऊसाचा रस हा केवळ गारवा देणारा नसून आरोग्यासाठी अत्यंत फायदेशीर आहे. तो शरीराला ऊर्जा देतो, पचन सुधारतो आणि उष्णतेमुळे वाढलेली शरीरातील उष्णता कमी करण्यास मदत करतो. तज्ज्ञांच्या मते, बर्फ किंवा इतर पदार्थ न मिसळता ताजा रस पिणे अधिक हितावह ठरते. आजच्या महागाईच्या काळात अवघ्या २० रुपयांत मिळणारा हा रस सर्वसामान्यांच्या खिशाला परवडणारा आहे. लहानांपासून मोठ्यांपर्यंत सर्वांच्याच पसंतीस उतरलेला ऊसाचा रस हा उन्हाळ्यातील ‘हिट ड्रिंक’ ठरत आहे. एकीकडे तापलेल्या उन्हाचा कहर आणि दुसरीकडे ऊसाच्या रसाची थंडगार चव…सांगोला तालुक्यात सध्या हेच चित्र सर्वत्र पाहायला मिळत आहे! ऊसाचा रस शरीरासाठी थंड आणि गुणकारी असतो. या रसामुळे शरीरातील शक्ती वाढत जाते. तसेच शरीरात वाढलेली उष्णता कमी होण्यास मदत होते. एक ग्लास ऊसाच्या रसात बर्फ किंवा अन्य काहीही न टाकता पिल्यास तो अधिक हितावह असतो, असे तज्ज्ञ डॉक्टरांनी सांगितले आहे.