🪔 एक पणती वंचिताच्या दारी : आपुलकी प्रतिष्ठानकडून गरजूंसाठी दिवाळी फराळ व साडी वाटप

🪔 एक पणती वंचिताच्या दारी : आपुलकी प्रतिष्ठानकडून गरजूंसाठी दिवाळी फराळ व साडी वाटप

वंचिताच्या चेहऱ्यावर आनंद निर्माण करण्याचे कार्य — डॉ. प्रभाकर माळी

सांगोला (प्रतिनिधी): समाजातील वंचित, दिव्यांग आणि गरजू घटकांना आनंदाचा स्पर्श देण्याचे कार्य आपुलकी प्रतिष्ठान, सांगोला सातत्याने करत आहे. “समाजातील दबलेल्या घटकाने मदतीसाठी हाक मारली असता त्याला ओ देणारी आपुलकी संस्था आहे. वंचिताच्या चेहऱ्यावर आनंद निर्माण करण्याचे काम आपुलकी प्रतिष्ठान करत आहे,” असे डॉ. गणपतराव देशमुख सहकारी सूतगिरणी सांगोलाचे चेअरमन डॉ. प्रभाकर माळी यांनी सांगितले.

‘एक पणती वंचिताच्या दारी’ या उपक्रमांतर्गत रविवारी तालुक्यातील ११ गरजू दिव्यांग बांधव आणि ८५ महिला भगिनींना दिवाळी फराळ व भाऊबीजेनिमित्त साडी वाटप करण्यात आले.

दानशूरांचा प्रतिसाद उत्साहवर्धक
आपुलकी प्रतिष्ठान गेली अनेक वर्षे सामाजिक उपक्रम राबवत असून, गेल्या पाच वर्षांपासून “एक पणती वंचिताच्या दारी” हा उपक्रम सातत्याने राबवला जात आहे. समाजातील वंचित घटकांची दिवाळी गोड व्हावी यासाठी शहर, तालुका, जिल्हा तसेच राज्याबाहेरूनही देणगीदारांनी सुमारे ₹९१,००० इतकी देणगी दिली. या निधीतून दिव्यांग व गरजू महिलांना दिवाळी फराळ, साडी आणि आवश्यक वस्तूंचे वाटप करण्यात आले, अशी माहिती अध्यक्ष राजेंद्र यादव यांनी आपल्या प्रास्ताविकात दिली.

मान्यवरांची उपस्थिती
या कार्यक्रमाला दैनिक माणदूत एक्सप्रेसचे संपादक मोहन मस्के, विजय सांगलीकर, कृष्णाबाई खटकाळे तसेच आपुलकी प्रतिष्ठानचे कार्यकर्ते मोठ्या संख्येने उपस्थित होते. यावेळी बापूसाहेब ठोकळे, विक्रम होवाळ यांनी मनोगत व्यक्त केले. कार्यक्रमाचे सूत्रसंचालन भीमाशंकर पैलवान यांनी केले, तर आभार प्रदर्शन संतोष महिमकर यांनी मानले.

📦 ‘एक पणती वंचिताच्या दारी’ची भेट
प्रत्येक लाभार्थ्यास अर्धा किलोचे पाच दिवाळी पदार्थ, साडी, टॉवेल, सुगंधी तेल, उटणे, साबण व पणती या वस्तूंचा समावेश असलेली भेट देण्यात आली.

💬 सामाजिक बांधिलकीतून साकारलेली ‘आपुलकी’
“राष्ट्रसंत गाडगेबाबा यांच्या विचाराप्रमाणे भुकेल्यास अन्न, तहानलेल्यास पाणी आणि गरजूला वस्त्र देणे ही खरी मानवतेची सेवा आहे. समाजातील दानशूर व्यक्ती घासातील घास देऊन वंचितांसाठी कार्य करत आहेत. हीच खरी ‘आपुलकी’ असून त्यामुळे ‘आहे रे’ आणि ‘नाही रे’ यातील दरी कमी होण्यास मदत होत आहे,” असे बापूसाहेब ठोकळे, सांगोला यांनी सांगितले.

📸
“एक पणती वंचिताच्या दारी” या उपक्रमांतर्गत आपुलकी प्रतिष्ठानतर्फे गरजू महिला व दिव्यांग बांधवांना दिवाळी फराळ व साडी वाटप करताना चेअरमन डॉ. प्रभाकर माळी, अध्यक्ष राजेंद्र यादव, मान्यवर व आपुलकी सदस्य.