आई-वडिलांनी दिलेले अध्यात्मिक संस्कार शेवटच्या श्वासापर्यंत जपणार – माजी आमदार दिपकआबा साळुंखे पाटील यांचा संकल्प

आई-वडिलांनी दिलेले अध्यात्मिक संस्कार शेवटच्या श्वासापर्यंत जपणार – माजी आमदार दिपकआबा साळुंखे पाटील यांचा संकल्प

स्व. शारदादेवी साळुंखे पाटील यांच्या जयंतीदिनी अध्यात्मनगरी जवळा दुमदुमली

सांगोला (तालुका प्रतिनिधी): स्वर्गीय आमदार काकासाहेब साळुंखे पाटील यांनी राजकारणाच्या माध्यमातून आणि आई स्व. शारदादेवी (काकी) साळुंखे पाटील यांनी अध्यात्माच्या मार्गातून सर्वसामान्य जनतेची निस्वार्थ सेवा करण्याचे जे संस्कार दिले, ते शेवटच्या श्वासापर्यंत प्राणपणाने जपणार असल्याचा ठाम निर्धार माजी आमदार दिपकआबा साळुंखे पाटील यांनी व्यक्त केला.

बुधवार, दि. ३१ डिसेंबर रोजी भगवतभक्त स्व. शारदादेवी साळुंखे पाटील यांच्या जयंतीनिमित्त आयोजित कार्यक्रमात ते बोलत होते. यावेळी संपूर्ण अध्यात्मनगरी जवळा परिसर भक्तिमय व अध्यात्मिक वातावरणाने भारून गेला होता.
आईच्या जयंतीनिमित्त बोलताना माजी आमदार दिपकआबा साळुंखे पाटील यांनी भविष्यातील महत्वाकांक्षी सामाजिक-आध्यात्मिक उपक्रमांची माहिती दिली. स्व. आमदार काकासाहेब साळुंखे पाटील, स्व. शंकुतलादेवी साळुंखे पाटील आणि भगवतभक्त स्व. शारदादेवी साळुंखे पाटील यांच्या स्मरणार्थ अध्यात्मनगरी जवळा येथे सुमारे ५ एकर परिसरात भव्य समाजोपयोगी प्रकल्प उभारण्यात येणार असल्याची घोषणा त्यांनी केली.

या अंतर्गत गोरगरीब कुटुंबातील मुला-मुलींच्या मोफत विवाहासाठी मंगल कार्यालय, महिला बचत गटातील सुमारे एक हजार महिलांना कच्चा माल तयार करण्यासाठी सुसज्ज सभागृह, तालुक्यातील तरुणांना माती व मॅट अशा दोन्ही प्रकारातील दर्जेदार कुस्ती प्रशिक्षणासाठी क्रीडा संकुल, तसेच ग्रामीण भागातील गरजू विद्यार्थ्यांसाठी स्पर्धा परीक्षेच्या अभ्यासासाठी सर्व सोयींनी युक्त अभ्यासिका सुरू करण्यात येणार आहे. याचबरोबर भगवतभक्त स्व. शारदादेवी साळुंखे पाटील यांच्या नावाने आळंदी ते पंढरपूर पालखी सोहळा सुरू करण्याचा संकल्पही त्यांनी यावेळी जाहीर केला.
सांगोला तालुक्याचे स्वर्गीय आमदार काकासाहेब साळुंखे पाटील यांच्या धर्मपत्नी आणि माजी आमदार दिपकआबा साळुंखे पाटील यांच्या मातोश्री भगवतभक्त स्व. शारदादेवी साळुंखे पाटील यांच्या ८४ व्या जयंतीनिमित्त अवघा जवळा परिसर भक्तीमय वातावरणात न्हाऊन निघाला होता.

स्व. काकींच्या स्मरणार्थ माजी आमदार शहाजीबापू पाटील यांच्या पत्नी रेखाताई पाटील, स्व. सुभाषनाना पाटील यांच्या पत्नी वृषाली (नानी) पाटील, विद्यमान आमदार बाबासाहेब देशमुख यांच्या पत्नी डॉ. निकिता देशमुख, तसेच डॉ. आस्था अनिकेत देशमुख यांच्यासह विविध राजकीय पक्षांच्या नेतेमंडळींच्या कुटुंबातील महिलांनी एकत्र येत ‘शारदाई वात्सल्यधाम’, आलेगाव रोड, जवळा येथील समाधीस्थळी पारिजातकाचे झाड लावले. यानिमित्ताने सांगोला तालुक्याच्या एकतेचे दुर्मिळ दर्शन घडले.

या जयंतीनिमित्त सकाळी ९.३० पासून भजन, कीर्तन, बालदिंडी तसेच तालुक्यातील असंख्य भजनी मंडळांच्या प्रभात फेरीमुळे संपूर्ण गाव परिसर अध्यात्मिक वातावरणाने भारावून गेला होता. गावातून स्व. काकासाहेब साळुंखे पाटील, स्व. शारदादेवी साळुंखे पाटील आणि स्व. शंकुतलादेवी साळुंखे पाटील यांच्या पादुकांची पालखी ‘शारदाई वात्सल्यधाम’ येथे आणण्यात आली. यावेळी स्व. काकासाहेब साळुंखे पाटील यांच्या ११ परतवंडांच्या हस्ते पादुकांची प्रतिष्ठापना करण्यात आली. जयंतीदिनी सांगोला शहर व तालुक्यातील साळुंखे पाटील कुटुंबावर प्रेम करणाऱ्या हजारो कार्यकर्त्यांनी स्व. शारदादेवी साळुंखे पाटील यांच्या स्मृतीस्थळाचे दर्शन घेत श्रद्धांजली अर्पण केली.

आई-वडिलांची सेवा करणारा “आधुनिक युगातील भक्त पुंडलिक” – दिपकआबा
माजी आमदार दिपकआबा साळुंखे पाटील यांनी आपल्या मातोश्री भगवतभक्त स्व. शारदादेवी साळुंखे पाटील यांची जिवापाड सेवा संपूर्ण तालुक्याने अनुभवली आहे. आई-वडिलांच्या निधनानंतरही त्यांच्या विचारांची व संस्कारांची पालखी अखंडपणे पुढे नेण्याचा त्यांनी घेतलेला संकल्प पाहता या जयंती सोहळ्यात उपस्थित ह.भ.प. डॉ. बिरा बंडगर महाराज यांनी त्यांचा उल्लेख “आधुनिक युगातील भक्त पुंडलिक” असा केला.

स्व. शारदादेवी काकींच्या आठवणींना उजाळा
भगवतभक्त स्व. शारदादेवी साळुंखे पाटील यांनी आयुष्यभर जाती-पाती व राजकीय भेदांपासून दूर राहून अध्यात्म व समाजसेवेचे कार्य अखंडपणे केले. त्यांचे कार्य सदैव स्मरणात राहील, असा विश्वास यावेळी उपस्थित महिलांनी व्यक्त करत त्यांच्या आठवणींना भावनिक उजाळा दिला.