प्रचाराच्या धडाक्यातून तापलेलं राजकारण, अपक्षांकडून प्रमुख उमेदवारांची पंचाईत
सांगोला (प्रतिनिधी): सांगोला नगरपरिषद निवडणुकीत तापलेलं वातावरण दिवसेंदिवस धगधगत असून प्रचाराच्या रणधुमाळीला अक्षरशः उधाण आलं आहे. सांगोला नगरपालिका निवडणुकीचा महत्त्वाचा टप्पा जवळ येत असताना शहरातील राजकीय वातावरण अक्षरशः तापले आहे. प्रमुख पक्षांचे उमेदवार विजयी होण्यासाठी जोरदार तयारी करत असतानाच अपक्ष उमेदवारांनी अनपेक्षितपणे प्रचाराचा जबरदस्त धडाका लावल्याने प्रमुख उमेदवारांची चांगलीच पंचाईत झाली आहे.
प्रचाराचा कालावधी मर्यादित असल्याने, प्रत्येक क्षण महत्वाचा ठरत आहे. नगराध्यक्ष व नगरसेवक पदाचे अनेक प्रमुख उमेदवार मतदारांशी सातत्याने संपर्क साधण्यासाठी पहाटेपासून रात्री उशिरापर्यंत धावपळ करतांना दिसत आहेत. दरम्यान, अत्यधिक धावपळीमुळे उमेदवार आणि त्यांच्या प्रचारयंत्रणेची अक्षरशः दमछाक होत आहे. काही प्रभागांमध्ये पक्षातील प्रमुख कार्यकर्त्यांमध्ये नाराजीचे वातावरण असून, काहीजण प्रचारापासून दूर ठेवताना दिसत आहेत. यामुळे पक्षाच्या रणनीतीला धक्का बसून प्रमुख उमेदवारांची चिंता वाढत आहे. नाराज कार्यकर्त्यांमुळे मतदारांमध्ये मिश्र संदेश जात असल्याची चर्चाही गल्लीबोळात रंगू लागली आहे.
मतदारांचा विश्वास संपादन करण्यासाठी आजी–माजी आमदार, नेतेमंडळी, प्रमुख नेते यांना थेट गल्लीबोळात जाऊन सभा घ्याव्या लागत आहेत. कधी कधी दहा–पंधरा जणांसाठीही सभा घेतल्या जात असून, मतदारांना हातावर हात ठेवून बसू नये म्हणून नेतेमंडळींना प्रत्यक्ष मोर्चेबांधणी करावी लागत आहे. प्रचारसभांमध्ये विकासाच्या अनेक आश्वासनांचा वर्षाव केला जात असला, तरी गेल्या काही वर्षांत अपूर्ण राहिलेल्या कामांमुळे मतदारांच्या मनात वचनपूर्तीबाबत प्रश्‍नचिन्ह निर्माण झाले आहे. ‘या वेळी दिलेली आश्वासने कितपत पूर्ण होतील?’ असा संभ्रम मतदारांत वाढताना दिसतो आहे.
प्रभागनिहाय मतदारांशी संपर्क साधताना नगराध्यक्ष आणि नगरसेवक पदाचे उमेदवार रात्रंदिवस धावपळ करतांना दिसत आहेत. मात्र, प्रमुख कार्यकर्त्यांतील नाराजीमुळे काही ठिकाणी प्रचारयंत्रणा शिथिल पडल्याचे चित्र निर्माण झाले आहे. काही कार्यकर्ते नाराजीत बाजूला बसल्याने उमेदवारांचे समीकरणच बिघडू लागले आहे. मतदारांना खड्डे, कचरा, दुर्गंधीचा अनुभवच प्रत्युत्तर म्हणून प्रचार करताना उमेदवारांना प्रत्यक्ष अनुभवाला येणारे शहरातील खड्डे, दुर्गंधीयुक्त कचरा, अस्वच्छता यावर मतदारांकडून सरळ सवाल विचारले जात आहेत. काही ठिकाणी तर उमेदवार आणि कार्यकर्त्यांना रस्त्यावरील खड्ड्यांमुळे त्रास सहन करत प्रचार करावा लागत आहे.
“विकासाचे आश्वासन देता, पण पायाखालचा रस्ता तरी नीट करा!” असे टोमणे मतदार थेट उमेदवारांना मारताना अनेक ठिकाणी ऐकू येत आहे. अपक्ष उमेदवारांनी देखील प्रचारात ताकद दाखवायला सुरुवात केली असून, घराघरांत जाऊन आपली मते पटवून देण्यासाठी तेही प्रचंड मेहनत घेत आहेत. काही अपक्षांनी केलेला हटके प्रचार, सरळ-सोप्या भाषेत केलेली मांडणी आणि स्थानिक प्रश्नांवर दिलेले ठोस उपाय यामुळे प्रमुख उमेदवारांची चिंता वाढली आहे. सांगोला नगरपरिषदेची निवडणूक दिवसेंदिवस अधिक रंगतदार आणि चुरशीची होत चालली आहे. प्रत्येक प्रभागात मतदार राजकारण्यांचे गणित बिघडवू शकतील अशा मनःस्थितीत असून, अंतिम क्षणापर्यंत परिस्थिती कशी पालटते याकडे सर्वांचे लक्ष लागले आहे.
