आमदार डॉ. बाबासाहेब देशमुखांच्या पाठपुराव्याला यश, सांगोला आगारासाठी पाच नवीन एसटी बसेस मंजूर

आमदार डॉ. बाबासाहेब देशमुखांच्या पाठपुराव्याला यश, सांगोला आगारासाठी पाच नवीन एसटी बसेस मंजूर

सांगोला (प्रतिनिधी): सांगोला विधानसभा मतदारसंघाचे आमदार डॉ. बाबासाहेब देशमुख यांच्या सातत्यपूर्ण पाठपुराव्याला यश मिळाले असून, महाराष्ट्र राज्य मार्ग परिवहन महामंडळाच्या सांगोला आगारासाठी पाच नवीन एसटी बसेस मंजूर करण्यात आल्या आहेत. या आधुनिक सुविधांनी सुसज्ज बसेस पुढील आठवड्यात सांगोला आगारात दाखल होणार असून, त्यामुळे तालुक्यातील सार्वजनिक वाहतूक व्यवस्थेला मोठी चालना मिळणार आहे.

सांगोला आगार हा सोलापूर–सांगली महामार्गावरील महत्त्वाचा आगार असून, येथून दररोज तालुक्यातील तसेच जिल्ह्याबाहेरील विविध मार्गांवर मोठ्या प्रमाणात प्रवासी वाहतूक केली जाते. मात्र, उपलब्ध बसांची संख्या अपुरी असल्याने अनेकदा फेऱ्या कमी पडत होत्या. परिणामी विद्यार्थी, शेतकरी, महिला, ज्येष्ठ नागरिक आणि रोजंदारीवर जाणाऱ्या कामगारांना मोठ्या गैरसोयीचा सामना करावा लागत होता.

ही समस्या लक्षात घेऊन आमदार डॉ. बाबासाहेब देशमुख यांनी परिवहन मंत्री प्रताप सरनाईक यांच्याकडे सातत्याने पाठपुरावा केला. तसेच संबंधित वरिष्ठ अधिकाऱ्यांशी वेळोवेळी बैठक घेऊन सांगोला आगारासाठी अतिरिक्त बसांची मागणी लावून धरली. या प्रयत्नांना अखेर यश मिळाले असून, पाच नवीन एसटी बसेस मंजूर करण्यात आल्या आहेत.

या नव्या बसेस सुरू झाल्यानंतर सांगोला–सोलापूर, सांगोला–पुणे, सांगोला–कोल्हापूर तसेच इतर महत्त्वाच्या मार्गांवरील बससेवा अधिक सक्षम होणार आहे. प्रवासी क्षमता वाढण्यासोबतच बसफेऱ्या अधिक नियमित होतील आणि सकाळी तसेच संध्याकाळी प्रवाशांना अधिक सुविधा उपलब्ध होणार आहेत.

याबाबत बोलताना आमदार डॉ. बाबासाहेब देशमुख म्हणाले, “सांगोला तालुक्यातील प्रत्येक नागरिकाला दर्जेदार आणि नियमित सार्वजनिक वाहतूक सुविधा मिळावी, यासाठी माझे सातत्याने प्रयत्न सुरू आहेत. भविष्यात आणखी नवीन बसेस आणि नव्या मार्गांसाठीही शासनाकडे पाठपुरावा सुरू राहील.”
दरम्यान, नवीन बसेस मंजूर झाल्याबद्दल सांगोला आगाराचे आगारप्रमुख व कर्मचाऱ्यांनी आमदार डॉ. बाबासाहेब देशमुख यांचे आभार मानले. तालुक्यातील नागरिकांनीही या निर्णयाचे स्वागत केले असून, विद्यार्थी, शेतकरी आणि सर्वसामान्य प्रवाशांसाठी हा निर्णय दिलासादायक ठरणार असल्याची भावना व्यक्त केली आहे. या बसेस मंजूर करण्यासाठी सहकार्य केल्याबद्दल मुख्यमंत्री देवेंद्र फडणवीस, उपमुख्यमंत्री सुनेत्रा पवार, उपमुख्यमंत्री एकनाथ शिंदे, परिवहन मंत्री प्रताप सरनाईक तसेच ग्रामविकास मंत्री तथा जिल्ह्याचे पालकमंत्री जयकुमार गोरे यांचे आमदार डॉ. बाबासाहेब देशमुख यांनी आभार मानले.