सांगोल्यात ६१ ग्रामपंचायतींच्या निवडणुकांचा बिगुल वाजला..!

सांगोल्यात ६१ ग्रामपंचायतींच्या निवडणुकांचा बिगुल वाजला..!

६१ ग्रामपंचायतींसाठी १२ जूनला आरक्षण सोडत; गावागावात राजकीय हालचालींना वेग

सांगोला (प्रतिनिधी): राज्य निवडणूक आयोगाच्या आदेशानुसार जानेवारी २०२६ ते डिसेंबर २०२६ या कालावधीत मुदत संपणाऱ्या तसेच नव्याने स्थापन झालेल्या ग्रामपंचायतींच्या सार्वत्रिक निवडणुकांच्या पार्श्वभूमीवर सांगोला तालुक्यातील राजकीय वातावरण तापू लागले आहे. सांगोला तालुक्यातील ६१ ग्रामपंचायतींची अंतिम प्रभाग रचना प्रसिद्ध करण्यात आली आहे. आता १२ जून रोजी विशेष ग्रामसभांमध्ये सदस्यांची आरक्षण सोडत काढण्यात येणार असून, त्यानंतर निवडणूक प्रक्रियेला अधिकृत वेग मिळणार आहे. तहसीलदार तथा राज्य निवडणूक आयोगाच्या प्राधिकृत केलेल्या अधिकाऱ्यांच्या अध्यक्षतेखाली १२ जून रोजी ही प्रक्रिया पार पडणार आहे. त्यामुळे भावी सरपंचांना ग्रामपंचायत आरक्षणाची उत्सुकता लागली आहे.

राज्य निवडणूक आयोगाच्या माहितीनुसार मुदत संपणाऱ्या ग्रामपंचायतीसाठी आरक्षण निश्चितीची कार्यवाही करण्यात येणार आहे. राज्य निवडणूक आयोगाच्या निर्देशानुसार अनुसूचित जाती (एससी), अनुसूचित जमाती (एसटी), नागरिकांचा मागास प्रवर्ग (ओबीसी) आणि महिलांसाठी आरक्षण निश्चितीची प्रक्रिया राबविण्यात येणार आहे. आरक्षण निश्चित करताना एकूण आरक्षणाची मर्यादा ५० टक्क्यांच्या आत ठेवणे बंधनकारक राहणार असून, ओबीसी आरक्षण २७ टक्क्यांपेक्षा अधिक असणार नाही. राज्य निवडणूक आयोगाचे सचिव सुरेश काकाणी यांनी याबाबतचे आदेश जारी केले आहेत. त्यानुसार १२ जून रोजी विशेष ग्रामसभांमध्ये आरक्षणाची सोडत काढण्यात येईल.

त्यानंतर १९ जून रोजी प्रभाग निहाय आरक्षण प्रारूप अधिसूचना प्रसिद्ध करण्यात येणार आहे. १९ जून ते २५ जून दरम्यान नागरिकांकडून हरकती व सूचना मागविण्यात येणार आहेत. उपविभागीय अधिकाऱ्यांच्या अभिप्रायानंतर जिल्हाधिकारी अंतिम अधिसूचनेस मंजुरी देतील. गावागावात राजकीय हालचालींना वेग आला असून, एक ते दोन महिन्यात निवडणुकांचा प्रत्यक्ष धुरळा उडण्याची शक्यता व्यक्त केली जात आहे. हरकतींच्या सुनावण्यांकडे नागरिक व इच्छुक उमेदवारांचे लक्ष लागले आहे. या सुनावण्यांनंतरच अंतिम प्रभाग रचनेचे चित्र स्पष्ट होणार असल्याने पुढील राजकीय समीकरणे ठरणार आहेत.

आरक्षण सोडतीचे वेळापत्रक
८ जून २०२६ विशेष ग्रामसभेची सूचना
१२ जून २०२६ विशेष ग्रामसभेत आरक्षण सोडत
१७ जून २०२६ प्रारूप अधिसूचनेस मान्यता
१९ जून २०२६ प्रारूप आरक्षण प्रसिद्ध
१९ ते २५ जून २०२६ हरकती व सूचना दाखल
३ जुलै २०२६ उपविभागीय अधिकाऱ्यांचा अभिप्राय
१० जुलै २०२६ अंतिम आरक्षण प्रसिद्ध

सांगोला तालुक्यातील जानेवारी २०२६ ते डिसेंबर २०२६ या कालावधीत मुदत संपणाऱ्या तसेच नव्याने स्थापन झालेल्या ग्रामपंचायतींच्या सार्वत्रिक निवडणुकांसाठी प्रशासकीय यंत्रणा सज्ज झाली आहे. अचकदाणी, आगलावेवाडी, अजनाळे, अकोला, आलेगाव, बामणी, भोपसेवाडी, बुद्धेहाळ, बुरंगेवाडी, चोपडी, देवळे, धायटी, डिकसळ, डोंगरगाव, एखतपूर, गायगव्हाण, घेरडी, गौडवाडी, हटकर मंगेवाडी, हलदहिवडी, हंगीरगे, हणमंतगाव, हातीद, इटकी, जवळा, जुजारपूर, जुनोनी, कडलास, कमलापूर, कटफळ, खिलारवाडी, किडबिसरी, कोळे, लक्ष्मीनगर, लोणविरे, लोटेवाडी, महिम, महूद (बु.), मानेगाव, मांजरी, मेडशिंगी, मेथवडे, नराळे, नाझरे, निजामपूर, पाचेगाव (बु.), पारे, राजुरी, संगेवाडी, शिरभावी, सोमेवाडी, तरंगेवाडी, तीप्पेहळी, उदनवाडी, वझरे, शिवणे, वाकी घेरडी, वाणीचिंचाळे, वासूद, वाटंबरे, मंगेवाडी (य.) व बुरलेवाडी या ग्रामपंचायतींचा समावेश आहे.