🚨 सांगोला–पंढरपूर रोडवर मध्यरात्री सिनेस्टाईल दरोडा

🚨 सांगोला–पंढरपूर रोडवर मध्यरात्री सिनेस्टाईल दरोडा

थारमधून आलेल्या चौघांनी व्यापाऱ्याची कार अडवून अडीच लाखांची लूट, कागदपत्रे व मोबाईलही हिसकावले

सांगोला (प्रतिनिधी): सांगोला–पंढरपूर रोडवर मध्यरात्रीच्या सुमारास घडलेल्या धाडसी दरोड्याच्या घटनेमुळे परिसरात भीतीचे वातावरण पसरले आहे. काळ्या रंगाच्या विना नंबरच्या थार गाडीतून आलेल्या चार अज्ञात इसमांनी भररस्त्यात कारला कट मारून गाडी थांबवली, चालक व प्रवाशांना दमदाटी करत कारच्या डिकीत ठेवलेली रोकड, कागदपत्रे व मोबाईल फोन जबरदस्तीने लुटून नेल्याची घटना २१ मार्च रोजी रात्री सुमारे ११ वाजण्याच्या सुमारास घडली. या प्रकरणी सांगोला पोलिस ठाण्यात तक्रार दाखल करण्यात आली आहे. याप्रकरणी दिलीप भागोजी पाटील (वय 58), रा. भोगम कॉलनी, मौजे चिंचवड, ता. करवीर, जि. कोल्हापूर यांनी सांगोला पोलिसात दिलेल्या फिर्यादीनुसार अनोळखी चौघांविरुद्ध गुन्हा दाखल करण्यात आला आहे.

याबाबत मिळालेली माहिती अशी, फिर्यादी दिलीप भागोजी पाटील (वय 58), रा. भोगम कॉलनी, मौजे चिंचवड, ता. करवीर, जि. कोल्हापूर हे कोल्हापूर येथील गांधीनगर परिसरात “श्री स्वामी समर्थ” या नावाने गाड्यांच्या स्पेअर पार्टचे दुकान चालवतात. त्या व्यवसायावर ते आपल्या कुटुंबाचा उदरनिर्वाह करतात. २१ मार्च रोजी सायंकाळी सुमारे ७ वाजता ते पत्नी सत्यकला पाटील व ओळखीचे चालक रामचंद्र साळुंखे यांच्यासह इर्टिगा कार (MH-09-JU-0371) मधून लातूर जिल्ह्यातील निलंगा येथे सुरू असलेल्या घराच्या बांधकामाच्या कामासाठी निघाले होते.

या वेळी बांधकामासाठी लागणाऱ्या खर्चाकरिता त्यांनी 2 लाख 50 हजार रुपये इतकी रोख रक्कम सोबत घेतली होती. ही रक्कम दोन कपड्यांच्या बॅगांपैकी एका बॅगेत ठेवून दोन्ही बॅगा कारच्या डिकीत ठेवल्या होत्या. प्रवासादरम्यान रात्री सुमारे 10 वाजता सांगोला हद्दीतील एका हॉटेलवर ते जेवणासाठी थांबले. जेवण करून ते पुन्हा निलंग्याकडे निघाले. सुमारे 11 वाजण्याच्या सुमारास सांगोला–पंढरपूर रोडवर ब्रिजपुढे सोलापूरकडे जाणाऱ्या रोडवर त्यांची कार पोहोचताच मागून भरधाव वेगाने आलेल्या काळ्या रंगाच्या विना नंबरच्या थार गाडीने अचानक कट मारून कार अडवली.

कार थांबताच थारमधून एक इसम उतरून चालकाच्या बाजूला आला व शिवीगाळ करत वाद घालू लागला. चालकाने काच खाली घेतल्यावर तो इसम जोरजोरात बोलू लागला. त्याच वेळी थारमधून आणखी तीन इसम उतरले. त्यापैकी एक चालकाजवळ आला तर उर्वरित दोघे कारच्या मागील बाजूस गेले. सर्व इसम अंदाजे 30 ते 35 वर्षे वयोगटातील होते. चारही जणांनी चालक रामचंद्र साळुंखे व फिर्यादी दिलीप पाटील यांना गाडीतून खाली उतरण्यास सांगत दमदाटी व शिवीगाळ सुरू केली. परिस्थिती चिघळल्याने झटापट झाली. फिर्यादी व चालक यांनी आरडाओरडा सुरू केला. याच गोंधळाचा फायदा घेत मागे गेलेल्या दोघांनी कारची डिकी उघडून दोन्ही कपड्यांच्या बॅगा हिसकावून घेतल्या व त्या थार गाडीत टाकल्या. दरम्यान, चालकाजवळ उभ्या असलेल्या इसमाने चालकाचे दोन मोबाईल फोन जबरदस्तीने काढून घेतले. काही क्षणातच चौघेही आरोपी थार गाडीत बसून सोलापूरच्या दिशेने भरधाव वेगाने पसार झाले.

लुटलेल्या बॅगेमध्ये 2 लाख 50 हजार रुपये रोख रक्कम, तसेच फिर्यादींच्या पत्नी सत्यकला पाटील यांचे मूळ आधारकार्ड, पॅनकार्ड व चार वेगवेगळ्या बँकांचे एटीएम कार्ड होते, असे फिर्यादीने पोलिसांना दिलेल्या तक्रारीत नमूद केले आहे. अचानक घडलेल्या या प्रकारामुळे फिर्यादी व त्यांचे कुटुंबीय घाबरून गेले होते. मानसिक धक्क्यामुळे ते तत्काळ पुढील प्रवास न करता कोल्हापुरला परतले. नंतर मनस्थिती स्थिर झाल्यानंतर त्यांनी सांगोला पोलिस ठाण्यात हजर राहून सविस्तर फिर्याद दिली. फिर्यादीने दिलेल्या तक्रारीनुसार, चार अज्ञात इसमांविरुद्ध जबरी चोरी व दरोड्याचा गुन्हा दाखल करण्यात आला आहे. भररस्त्यात कार अडवून केलेल्या या धाडसी लुटीमुळे सांगोला परिसरात खळबळ उडाली असून, विना नंबरच्या थार गाडीचा शोध घेण्यासाठी पोलिसांचा तपास सुरू आहे. घटनेची माहिती मिळताच पोलीस निरीक्षक विनोद घुगे, पोसई पाटील, मपोसई उबाळे यांनी घटनास्थळी भेट दिली. या गुन्ह्याचा अधिक तपास पोसई पाटील करीत आहेत.