📰 उज्ज्वल भविष्य घडविणारी शिक्षणसंस्था — “गुरुकुल पूर्व प्राथमिक विद्यालय” व “ज्ञानसंस्कार परिवार” : माजी आमदार दत्तात्रय सावंत

📰 उज्ज्वल भविष्य घडविणारी शिक्षणसंस्था — “गुरुकुल पूर्व प्राथमिक विद्यालय” व “ज्ञानसंस्कार परिवार” : माजी आमदार दत्तात्रय सावंत

मंगळवेढा (प्रतिनिधी): संत विचारांची आणि मौलिक तत्त्वांची परंपरा लाभलेल्या मंगळा संतभूमीत सामाजिक क्रांतीचा ध्यास घेत संस्थापक दामाजी माळी यांनी स्थापन केलेल्या ज्ञानसंस्कार परिवार आणि गुरुकुल पूर्व प्राथमिक विद्यालय या संस्था म्हणजे “उज्ज्वल भविष्य निर्मितीच्या पिढ्यांचे सारस्वत भांडार” असल्याचे गौरवोद्गार पुणे विभागीय शिक्षक मतदारसंघाचे माजी आमदार दत्तात्रय सावंत यांनी काढले.

अक्षरगंगा प्रज्ञाशोध परीक्षा, एक्सलंट ऑलिंपियाड, नवोदय पूर्व परीक्षा व ब्रेन डेव्हलपमेंट एक्झाममधील गुणवंत विद्यार्थ्यांचा बक्षीस वितरण समारंभ लक्ष्मीनारायण मंगल कार्यालयात उत्साहात पार पडला. यावेळी प्रमुख पाहुणे म्हणून माजी आमदार दत्तात्रय सावंत उपस्थित होते. कार्यक्रमाच्या अध्यक्षस्थानी महात्मा गांधी विद्यालय वाघोलीचे मुख्याध्यापक चिदानंद माळी होते.

स्वागत व प्रास्ताविकात संस्थापक दामाजी माळी म्हणाले, “गुणात्मक शिक्षणाच्या गुणवत्तेचा ध्यास घेत ज्ञानसंस्कार परिवार व गुरुकुल विद्यालयाने विद्यार्थ्यांच्या बौद्धिक विकासासाठी अनेक स्पर्धात्मक व्यासपीठे उपलब्ध करून दिली आहेत. विद्यार्थी-केंद्रित सर्वांगीण विकास हा आमचा मूलमंत्र आहे. पुढील काळातही गुणवत्तेची ही परंपरा कायम ठेवण्यासाठी आम्ही वचनबद्ध आहोत.”

यावेळी मार्गदर्शन करताना माजी आमदार सावंत म्हणाले, “विद्यार्थ्यांनी आत्मविश्वासाने आणि सकारात्मक विचारसरणीने आपली वाटचाल करत समाजाच्या प्रगतीत मोलाचा वाटा उचलावा. समाजाभिमुख शिक्षण हेच खरे यशाचे मूळ आहे. अशा समाजाभिमुख शिक्षणाला दिशा देणाऱ्या ज्ञानसंस्कार परिवार व गुरुकुल विद्यालयाने शिक्षण क्षेत्रात उभारलेली ओळख ही सर्वांगीण समाजव्यवस्थेची गुरुकिल्ली आहे.”

कार्यक्रमात दत्तात्रय खडतरे (अध्यक्ष, महाराष्ट्र टेक्निकल इन्स्टिट्यूट), अजय अदाटे (ॲग्रीक्रॉस कंपनी), मनोज माळी, सचिन माळी, प्रशांत तोडकरी आदी मान्यवर उपस्थित होते.

मुख्याध्यापक चिदानंद माळी यांनी आपल्या अध्यक्षीय भाषणात म्हटले, “संस्कार आणि संस्कृती यांची विद्यार्थीदशेतील पायाभरणी होण्यासाठी सक्षम शिक्षण व्यवस्था अत्यावश्यक आहे. ए.आय.सारख्या आधुनिक युगात कौशल्यपूर्ण विद्यार्थी घडविण्यासाठी अशा स्पर्धा ही काळाची गरज आहे. ज्ञानसंस्कार परिवाराने घेतलेला हा उपक्रम उज्ज्वल भविष्याचा दिशादर्शक ठरेल.” कार्यक्रमाचे आभार अजय अदाटे यांनी मानले.
समारंभ यशस्वी करण्यासाठी ज्ञानसंस्कार परिवार व गुरुकुल पूर्व प्राथमिक विद्यालयाचे शिक्षकवृंद यांनी परिश्रम घेतले.