स्वावलंबनाचा हातभार : महिला दिनी आपुलकी प्रतिष्ठानकडून गरजू महिलांना उपजीविकेच्या साधनांचे वाटप
स्वावलंबनाचा हातभार : महिला दिनी आपुलकी प्रतिष्ठानकडून गरजू महिलांना उपजीविकेच्या साधनांचे वाटप
सांगोला (प्रतिनिधी) : जागतिक महिला दिनानिमित्त निमित्त सांगोला येथील आपुलकी प्रतिष्ठानच्या वतीने पाच गरजू महिलांना उदरनिर्वाहासाठी आवश्यक वस्तू भेट देत महिला दिन आगळ्यावेगळ्या पद्धतीने साजरा करण्यात आला. या उपक्रमातून महिलांना स्वावलंबी बनविण्याचा प्रयत्न करत प्रतिष्ठानने सामाजिक बांधिलकीचे उदाहरण समाजासमोर ठेवले.
सांगोला शहर व तालुक्यातील पाच गरजू महिलांची निवड करून त्यांच्या उपजीविकेसाठी आवश्यक साहित्याचे वितरण करण्यात आले. यामध्ये दोन महिलांना शेळ्या, दोन महिलांना शिलाई मशीन तर एका महिलेला पिठाची गिरणी देण्यात आली. या साधनांच्या माध्यमातून संबंधित महिलांना स्वतःच्या पायावर उभे राहण्यास मदत होणार आहे.
कार्यक्रमाचे प्रमुख पाहुणे दत्तात्रय जाधव, ॲड. सारंग वांगीकर तसेच दै. सकाळचे बातमीदार दत्तात्रय खंडागळे यांच्या हस्ते लाभार्थींना या वस्तूंचे वितरण करण्यात आले.
यावेळी आपुलकी प्रतिष्ठानचे सदस्य शहाजी गडहिरे, ॲड. सारंग वांगीकर आणि दत्तात्रय खंडागळे यांनी मनोगत व्यक्त करताना सांगितले की, सामाजिक कार्यात अग्रेसर असलेल्या आपुलकी प्रतिष्ठानने महिला दिन आगळ्यावेगळ्या पद्धतीने साजरा करत महिलांना स्वावलंबनाची संधी उपलब्ध करून दिली आहे. हा उपक्रम समाजासाठी प्रेरणादायी असल्याचे त्यांनी नमूद केले.
कार्यक्रमाचे प्रास्ताविक अध्यक्ष राजेंद्र यादव यांनी केले, तर आभार सोमनाथ सपाटे यांनी मानले. आपुलकी प्रतिष्ठानच्या कार्यालयात झालेल्या या कार्यक्रमाला महिला तसेच प्रतिष्ठानचे सदस्य मोठ्या संख्येने उपस्थित होते.
