🚨 महूद परिसरात चोरट्यांचा धुमाकूळ! दहा दिवसांत तिसरी चोरी

🚨 महूद परिसरात चोरट्यांचा धुमाकूळ! दहा दिवसांत तिसरी चोरी

मुलाणी वस्तीवर दरोडा – अडीच तोळे दागिने व ८२ हजार रोख लंपास; नागरिकांमध्ये भीतीचे वातावरण

सांगोला (प्रतिनिधी): महूद परिसरात चोरट्यांनी अक्षरशः धुमाकूळ घातला असून दहा दिवसांत तिसऱ्यांदा घरफोडीची घटना घडली आहे. गुरुवारी (ता.१६) मध्यरात्री महूद-पंढरपूर मार्गावरील मुलाणी वस्ती येथे चोरट्यांनी अस्लम नबीलाल मुलाणी यांच्या घरावर दरोडा टाकून मुलाणी पती पत्नीच्या तोंडावर गुंगीचे स्प्रे मारून सुमारे अडीच तोळे सोन्याचे दागिने आणि ₹८२ हजारांची रोख रक्कम लंपास केली. गेल्या दहा दिवसात चोरट्यांनी तीन ठिकाणी चोऱ्या करून सुमारे साडेअकरा तोळे सोन्याचे दागिने आणि सुमारे दोन लाख रुपयांची लूट केली आहे. या घटनेमुळे परिसरात भीतीचे वातावरण निर्माण झाले असून पोलिसांच्या कार्यक्षमतेवरही प्रश्नचिन्ह उपस्थित केले जात आहे.

महूद येथील फळ विक्रेते अस्लम मुलाणी हे घराबाहेर झोपले होते, तर कुटुंबीय घरात झोपलेले होते. चोरट्यांनी अस्लम नबीलाल मुलाणी यांच्या घरावर दरोडा टाकून मुलाणी पती पत्नीच्या तोंडावर गुंगीचे स्प्रे मारून सुमारे अडीच तोळे सोन्याचे दागिने आणि ₹८२ हजारांची रोख रक्कम लंपास केली. चोरीनंतर घरातील साहित्य घराबाहेर फेकून देत चोरट्यांनी घराची उलथापालथ केली. असलम मुलाणी यांचा शेळ्या-मेंढ्या खरेदीचा व्यवसाय असून मुलाच्या उच्च शिक्षणासाठी त्यांनी जपून ठेवलेली रक्कमही चोरट्यांनी लंपास केल्याने कुटुंबावर आर्थिक संकट कोसळले आहे.वारंवार होणाऱ्या या चोऱ्यांमुळे सामान्य नागरिकांच्या मनामध्ये भीतीचे वातावरण पसरले आहे. या दहा दिवसात आणि यापूर्वी झालेल्या असंख्य चोऱ्यांपैकी कोणत्याच चोऱ्यांचा तपास लावण्यात पोलीस यंत्रणेला आत्तापर्यंत यश आले नाही. पोलिसांच्या या अकार्यक्षमतेमुळे चोरांचा आत्मविश्वास वाढल्याचे दिसून येत आहे. त्यामुळे चोरांचा बंदोबस्त करण्यात यावा अशी मागणी नागरिकांतून होत आहे.

महूदमध्ये दहा दिवसांत साडेअकरा तोळे सोने गायब

७ जुलै : महूद-अकलूज मार्गावरील संजय बाजारे यांच्या घरातून साडेसात तोळे सोने व ८० हजार चोरी.
१२ जुलै : महूद-सांगोला मार्गावरील आनंदलाल विभुते यांच्या घरातून दीड तोळे सोने, चांदी व १० हजार रोख चोरी.
१६ जुलै : महूद-पंढरपूर मार्गावरील मुलाणी वस्तीवर अडीच तोळे सोने व ८२ हजार रोख लंपास.

महूद परिसरातील वाड्या-वस्त्यांवर सुरू असलेल्या अनियमित लोडशेडिंगमुळे नागरिक त्रस्त झाले आहेत. रात्रीच्या अंधाराचा फायदा घेत चोरटे सक्रिय झाले असून शेतीमाल, जनावरे, शेळ्या-मेंढ्या आणि घरफोडीच्या घटना वाढल्या आहेत. त्यामुळे लोडशेडिंगवर नियंत्रण आणण्यासह रात्री पोलीस गस्त वाढविण्याची मागणी नागरिकांकडून होत आहे.”चोऱ्यांचा तपास कधी लागणार?”वारंवार घडणाऱ्या चोऱ्यांपैकी एकाही घटनेचा उलगडा अद्याप झालेला नसल्याने नागरिकांमध्ये संताप व्यक्त होत आहे. चोरट्यांचा तातडीने बंदोबस्त करून परिसरात सुरक्षिततेची भावना निर्माण करावी, अशी मागणी महूदकरांकडून होत आहे.