नगरपालिका निवडणुकीच्या मैदानात रंगले ‘सोशल मीडिया वॉर’

नगरपालिका निवडणुकीच्या मैदानात रंगले ‘सोशल मीडिया वॉर’

खोट्या आश्वासनांमुळे मतदारांमध्ये संताप, निवडणुकांच्या रणांगणात ‘सोशल मीडिया’चा प्रभाव

सांगोला (प्रतिनिधी): सांगोला नगरपरिषदेच्या निवडणुकीत हायटेक प्रचाराचा धुराळा उडत असून, सर्वच उमेदवारांनी सोशल मीडियावरून प्रचार युद्ध सुरू केले आहे. सांगोला नगरपरिषदेच्या निवडणुकीत हायटेक प्रचाराचा धुराळा उडत असून, सर्वच उमेदवारांनी सोशल मीडियावरून प्रचार युद्ध सुरू केले आहे. निवडणुकीत उमेदवारांनी पारंपरिक पदयात्रा आणि कॉर्नर सभांना फाटा देत प्रचाराची सूत्रे समाज माध्यमांवर सोपवली आहे. प्रत्येक प्रभागातील उमेदवारांनी ’हाय-टेक’ प्रचारावर भर दिला असून, सोशल मीडिया हेच रणांगण बनले आहे. प्रभागातील प्रत्येक घरातील किमान एका व्यक्तीचा व्हॉट्सअ‍ॅप क्रमांक मिळवून, त्यावर प्रचाराचा मारा करण्यात येत आहे.

सांगोला नगरपरिषद निवडणुकीत मतदारांपर्यंत पोहोचण्यासाठी उमेदवारअनेक नवनवीन प्रयोग करताना दिसत आहेत. या काळात स्वतःचे मार्केटिंग करण्यासाठी व मतदारांना आकर्षित करून घेण्यासाठी उमेदवारांनी सोशल मीडिया हा नवा मार्केटिंगचा फंडा निवडला आहे. मागील १५ ते २० वर्षांपूर्वीची निवडणूक आणि वर्तमानातील निवडणूक यामध्ये कमालीचा फरक दिसून येत आहे. सद्यस्थितीत नगरपरिषद निवडणुकीत सुद्धा सोशल मीडियाचा प्रभाव स्पष्टपणे दिसतो आहे. प्रचाराच्या जुन्या माध्यमांना बाजूला सारत काही क्षणांमध्ये मतदारांपर्यंत पोहोचण्यासाठी निवडणूक रिंगणात असलेल्या नगराध्यक्ष तसेच नगरसेवक पदासाठी उमेदवारी अर्ज दाखल केलेले अनेक उमेदवार सोशल मीडियाचा खुबीने वापर करीत आहेत.

दरम्यान पूर्वीच्या काळी तीन चाकी रिक्षा त्याचबरोबर चार चाकी गाडीतून ध्वनिक्षेपकावर उमेदवारांचे नाव चिन्ह पक्ष आणि निवडून का द्यायचंय यासंदर्भातली कारणे आणि मुद्दे जाहीरपणे सांगताना गल्लोगल्ली फिरताना दिसायचे. मात्र आज काळ बदलत गेला आणि नवनवीन माध्यमे उदयाला आली. यापैकीच सोशल मीडिया हे माध्यम

उमेदवारांसाठी अतिशय चांगला पर्याय म्हणून समोर आले आहे. विशेष म्हणजे उमेदवारी अर्ज दाखल करताना त्याचबरोबर मतदारांच्या गाठीभेटी घेताना तसेच आपला पक्ष, आपले चिन्ह आणि आपला नेता यासंदर्भामध्ये नवनवीन संकल्पनांचा वापर करत प्रभावी व्हिडिओ, ऑडिओ वाजवत उमेदवारांनी मतदारांचे लक्ष वेधून घेतले आहे. या सोशल मीडियामुळे उमेदवारांना मार्केटिंगचा नवा पर्याय मिळाला असला तरी या लोकशाहीत मतदार कोणाला मतदान करतील हे मात्र गुपीतच असते.

उमेदवारांचे छायाचित्र, आश्वासनांची खैरात, आकर्षक ग्राफिक्स आणि व्हिडिओ क्लिप्सचा भडिमार मतदारांवर केला जात आहे. प्रत्येक प्रभागात प्रमुख चार पक्षांचे मिळून उमेदवार रिंगणात आहेत. व्हॉट्सअ‍ॅप ग्रुप्स, फेसबुक आणि इंस्टाग्रामच्या माध्यमातून हा प्रचार अत्यंत वेगाने घराघरात पोहोचवला जात आहे. तंत्रज्ञानाच्या या युगात उमेदवार मतदारांच्या थेट खिशात पोहोचले आहेत. ’सोशल मीडिया वॉर रूम’ मुळे निवडणुकीच्या निमित्ताने तरुणांच्या हाताला काही काळापुरता रोजगार मिळाला आहे. हे हँडलर्स प्रतिस्पर्धी उमेदवारावर नजर ठेवणे, त्यांच्या पोस्टला प्रत्युत्तर देणे आणि आपल्या उमेदवाराची प्रतिमा उजळवणे, असे काम चोख बजावत आहेत. या सोशल मीडिया युद्धामुळे निवडणुकीची चुरस वाढली आहे.