🌟 सांगोल्यात उमेदवारीसाठी रस्सीखेच! कोणाला लागणार नगराध्यक्षपदाची ‘सोन्याची लॉटरी’?

🌟 सांगोल्यात उमेदवारीसाठी रस्सीखेच! कोणाला लागणार नगराध्यक्षपदाची ‘सोन्याची लॉटरी’?

राजकीय समीकरणे ढवळून निघणार; नव्या चेहऱ्याला मिळणार मोठी संधी?

सांगोला (प्रतिनिधी): सांगोला नगरपालिकेच्या निवडणुकीचा बिगुल वाजताच राजकीय वातावरण अक्षरशः तापले आहे. शहरात ठिकठिकाणी बैठका, चर्चांचा सिलसिला सुरू असून उमेदवारीच्या शर्यतीत कोण वरचढ ठरणार, याकडे सर्वांचे लक्ष लागले आहे. भाजप, शिवसेना, शेकाप, राष्ट्रवादी काँग्रेस आणि काँग्रेस या सर्वच पक्षांनी स्वबळावर निवडणूक लढवण्याची घोषणा केल्याने यंदाची लढत रंगणार ‘चुरशीची’ ठरणार आहे.
राजकारणात “कोणीही कायमचा शत्रू नाही, आणि मित्र तर अजिबात नाही” हे वाक्य सांगोला शहरात खरे ठरतेय. राजकीय स्वार्थासाठी मित्र–पक्ष वेगवेगळ्या दिशांना निघाल्याचे चित्र निर्माण झाले असून, काही ठिकाणी जुने शत्रू एकत्र येण्याची शक्यताही नाकारता येत नाही. त्यामुळे नव्या ‘समीरकरणा’चा तडाखा सांगोल्याला बसणार का, अशी चर्चा राजकीय वर्तुळात रंगली आहे.

🔹 सर्वच दिग्गजांचे नगराध्यक्षपदावर लक्ष!

नगराध्यक्षपदासाठी सर्वच दिग्गजांनी आपापले मोहरे पुढे केले आहेत. आमदार डॉ. बाबासाहेब देशमुख यांनी शेकापकडून मारुती बनकर, माजी आमदार शहाजीबापू पाटील यांनी शिवसेनेकडून आनंदा माने, माजी आमदार दीपकआबा साळुंखे पाटील यांनी शिवाजी बनकर, भाजप जिल्हाध्यक्ष चेतनसिंह केदार सावंत यांनी सुजाता केदार सावंत, तर काँग्रेस तालुकाध्यक्ष अजयसिंह इंगवले यांनी विश्वेश झपके यांच्या नावांची घोषणा केली आहे. दरम्यान, राष्ट्रवादी काँग्रेस शरद पवार) या पक्षाच्या उद्या (१० नोव्हेंबर) सांगोल्यातील कार्यकर्ता मेळाव्यातून नवे संकेत मिळणार असल्याने सगळ्यांचे लक्ष त्याकडे लागले आहे.

🔹 महायुती की स्वबळावरची झुंज?

महायुती आणि महाविकास आघाडीतील विसंवादामुळे यंदा दोन्ही आघाड्यांचे ‘एकत्र येणे’ अशक्य असल्याचे स्पष्ट होत आहे. सर्वच पक्षांनी मित्रपक्षांना विश्वासात न घेता थेट नगराध्यक्ष पदाचे उमेदवार जाहीर केल्याने ‘धक्कातंत्रा’चा वापर झाल्याची चर्चा रंगली आहे. नगराध्यक्षपदासाठी इच्छुकांची संख्या विक्रमी असून अनेकांनी तर या पदासाठीच पक्षप्रवेश केला आहे. अखेरीस जिंकून देणारा चेहरा कोण ठरणार, यावरच सर्व समीकरणे अवलंबून आहेत.

🔹 काँग्रेससमोर अस्तित्वाचा प्रश्न!

एकेकाळी सांगोला नगरपालिकेवर एकहाती सत्ता असलेली काँग्रेस आज अस्तित्वासाठी झगडताना दिसते. पक्षातील इच्छुकांना उमेदवारीसाठी विरोधकांच्या दारात जावे लागत असल्याची चर्चा राजकीय वर्तुळात सुरू आहे. काँग्रेसचा विचार पुन्हा जिवंत ठेवण्याची जबाबदारी तालुकाध्यक्ष अजयसिंह इंगवले यांच्या खांद्यावर असल्याचे चित्र आहे.

🔹 जनतेचे लक्ष ‘त्या’ लॉटरीकडे!

राजकीय समीकरणांमध्ये सतत बदल होत असताना, महायुती आणि महाविकास आघाडीतील मतभेद उफाळून आले आहेत. त्यामुळे अखेर नगराध्यक्षपद कोणाच्या पदरात पडणार, कोणाचे राजकीय भविष्य उजळणार, याकडे सांगोला वासियांचे डोळे लागले आहेत. या वेळीची सांगोला नगरपालिका निवडणूकीचा रंगतदार खेळ ठरण्याची चिन्हे आहेत.