🌅 सांगोल्यात शुभदिपावली सुरमयी पहाटेत संगीत स्वरांचा दरवळ

🌅 सांगोल्यात शुभदिपावली सुरमयी पहाटेत संगीत स्वरांचा दरवळ

रसिक मंत्रमुग्ध; दत्त मंदिरात ‘सुरमयी पहाट’ कार्यक्रमाची रंगत

सांगोला (प्रतिनिधी): दिपावलीच्या पहाटे सांगोला शहर भक्तीभाव आणि सुरांनी दुमदुमले. नरक चतुर्दशी निमित्त सोमवार २० ऑक्टोबर रोजी पहाटे पाच वाजता महादेव गल्ली येथील श्री दत्त मंदिरात “शुभदिपावली सुरमयी पहाट” या बहारदार संगीत मैफिलीचे आयोजन करण्यात आले. या मैफिलीने सांगोल्याची पहाट सुरांच्या माधुर्याने उजळून निघाली.

भावगीत, भक्तीगीत, नाट्यगीत आणि गोंधळगीत अशा विविध संगीत प्रकारांनी सजलेल्या या कार्यक्रमात रसिक श्रोते मंत्रमुग्ध झाले. गायक श्री. दयानंद बनकर (संगीत विशारद) आणि श्री. अतुल उकळेसर यांनी आपल्या मधुर आवाजात गीतांचे मनोहारी सादरीकरण केले. त्यांना पखवाजावर श्री. चैतन्य झाडे आणि तबल्यावर श्री. रणजीत सुतार यांनी अप्रतिम साथ दिली. कार्यक्रमाचे प्रभावी निवेदन व सूत्रसंचालन श्री. सुधीर गायकवाड यांनी केले.

या प्रसंगी डॉ. प्रा. राजेंद्र सूर्यवंशी, कुमारी वैष्णवी बनकर, श्री. प्रसाद भाकरे, चंद्रकांत लिंगे, श्री. सचिन ढोले, श्री. भैरवनाथ गोडसे, श्री. गणेश भंडारे तसेच सर्व बालकलावंत चमूनेही आपला सुरेल सहभाग नोंदवला.
कार्यक्रमाचे आयोजन माजी नगरसेवक सोमेश यावलकर यांच्या पुढाकाराने करण्यात आले. कार्यक्रमानंतर श्री दत्त मंदिर समिती तर्फे सर्व कलाकारांचा सत्कार करण्यात आला. या वेळी प्रा. राजेंद्र ठोंबरे यांनी या उपक्रमाचे कौतुक करत तो दरवर्षी नियमितपणे घेण्याचे सांगितले. ह.भ.प. सुभाष लऊळकर महाराज यांनी कार्यक्रमाचे आभार प्रदर्शन केले. संपूर्ण दत्त मंदिर परिसरात भक्ती, संगीत आणि आनंदाचे वातावरण निर्माण झाले होते. या सुरमयी दीपावली पहाटेने सांगोल्याच्या सांस्कृतिक जीवनात एक अविस्मरणीय अध्याय कोरला गेला.