टेंभू-म्हैसाळच्या पाण्यासाठी आमदार डॉ.बाबासाहेब देशमुख आक्रमक!

टेंभू-म्हैसाळच्या पाण्यासाठी आमदार डॉ.बाबासाहेब देशमुख आक्रमक!

मुख्य अभियंता अहिरराव यांच्यासोबत सिंचन भवनात महत्त्वपूर्ण बैठक; शेतकऱ्यांच्या प्रश्नांवर तातडीने कार्यवाहीचे निर्देश

सांगोला (प्रतिनिधी): सांगोला तालुक्यातील टेंभू आणि म्हैसाळ सिंचन योजनांच्या पाण्याचा प्रश्न ऐरणीवर आला असून, शेतकऱ्यांना वेळेत पाणी उपलब्ध करून देण्यासाठी आमदार बाबासाहेब देशमुख यांनी आक्रमक भूमिका घेतली आहे. टेंभू-म्हैसाळ योजनांतील विविध अडचणी, पाणी वितरणातील समस्या आणि शेतकऱ्यांच्या प्रलंबित मागण्यांबाबत आमदार डॉ.बाबासाहेब देशमुख यांनी सिंचन भवन, कोल्हापूर येथे मुख्य अभियंता अलका अहिरराव यांच्यासह संबंधित अधिकाऱ्यांची महत्त्वपूर्ण बैठक घेतली. यावेळी शेतकऱ्यांच्या प्रश्नांवर सविस्तर चर्चा होऊन लवकरात लवकर पाणी सोडण्याचे आश्वासन मुख्य अभियंत्यांनी दिले.

सांगोला तालुक्यातील अनेक गावांमध्ये सिंचनासाठी टेंभू आणि म्हैसाळ योजनांच्या पाण्यावर शेतकऱ्यांची मोठी भिस्त आहे. मात्र, विविध तांत्रिक व प्रशासकीय अडचणींमुळे पाणी उपलब्ध होण्यात अडथळे निर्माण होत असल्याने शेतकऱ्यांमध्ये नाराजीचे वातावरण आहे. या पार्श्वभूमीवर आमदार डॉ.बाबासाहेब देशमुख यांनी थेट सिंचन विभागाच्या वरिष्ठ अधिकाऱ्यांची भेट घेत शेतकऱ्यांच्या समस्या मांडल्या. बैठकीदरम्यान सोनंद पंचायत समिती गणाचे सदस्य मुकेश काशीद तसेच सोनंद-गळवेवाडी परिसरातील अनेक शेतकरी उपस्थित होते. शेतकऱ्यांनी टेंभू व म्हैसाळ योजनांमधून अपेक्षित पाणी उपलब्ध होत नसल्याच्या समस्या अधिकाऱ्यांसमोर मांडल्या. पाणी वितरणातील अडचणी, सिंचनासाठी आवश्यक पाण्याची उपलब्धता, पाणी सोडण्यास होणारा विलंब तसेच संबंधित भागातील इतर मागण्यांवरही चर्चा करण्यात आली. शेतकऱ्यांच्या अडचणी ऐकून घेत आमदार बाबासाहेब देशमुख यांनी सांगोला तालुक्यातील शेतकऱ्यांना सिंचनासाठी वेळेत आणि पुरेसे पाणी मिळालेच पाहिजे, अशी ठाम भूमिका मांडली. पाण्याअभावी पिकांचे नुकसान होण्याची शक्यता असल्याने प्रशासनाने या प्रश्नाकडे केवळ प्रशासकीय बाब म्हणून न पाहता शेतकऱ्यांच्या जीवन-मरणाचा प्रश्न म्हणून पाहण्याची गरज असल्याचे त्यांनी अधिकाऱ्यांच्या निदर्शनास आणून दिले.

दरम्यान, बैठकीत मुख्य अभियंता अलका अहिरराव यांनी शेतकऱ्यांच्या समस्या गांभीर्याने ऐकून घेतल्या. टेंभू-म्हैसाळ योजनांशी संबंधित अडचणींची माहिती घेत त्यांनी संबंधित अधिकाऱ्यांना आवश्यक त्या सूचना देण्याचे निर्देश दिले. तसेच सांगोला तालुक्यातील संबंधित भागासाठी लवकरात लवकर पाणी सोडण्यात येईल, असे आश्वासन त्यांनी दिले. या आश्वासनामुळे बैठकीस उपस्थित असलेल्या शेतकऱ्यांना काहीसा दिलासा मिळाला असून, आता प्रत्यक्षात पाणी कधी उपलब्ध होते, याकडे शेतकरी वर्गाचे लक्ष लागले आहे. बैठकीनंतर आमदार डॉ.बाबासाहेब देशमुख यांनी सांगितले की, सांगोला तालुक्यातील शेतकऱ्यांसाठी सिंचनाचे पाणी हा अत्यंत जिव्हाळ्याचा आणि महत्त्वाचा प्रश्न आहे. टेंभू आणि म्हैसाळ योजनांमुळे तालुक्यातील मोठ्या क्षेत्राला सिंचनाचा लाभ मिळण्याची अपेक्षा आहे. मात्र, योजनेतील अडचणी किंवा पाणी वितरणातील विलंबामुळे शेतकऱ्यांचे नुकसान होऊ नये, यासाठी प्रशासनाने तातडीने उपाययोजना करणे गरजेचे आहे.“शेतकऱ्यांच्या हक्काचे पाणी वेळेत मिळाले पाहिजे. यासाठी आवश्यक त्या पातळीवर पाठपुरावा केला जाईल. संबंधित यंत्रणेने विलंब न करता कार्यवाही करून शेतकऱ्यांना पाणी उपलब्ध करून द्यावे,” अशी भूमिका आमदार डॉ. बाबासाहेब देशमुख यांनी मांडली.

टेंभू-म्हैसाळ योजनांच्या पाण्याचा प्रश्न गेल्या काही काळापासून सांगोला तालुक्यात चर्चेचा विषय ठरत आहे. पाण्याच्या उपलब्धतेवर खरीप, रब्बी तसेच इतर पिकांचे भवितव्य अवलंबून असल्याने शेतकऱ्यांसाठी या प्रश्नाचे महत्त्व अधिक आहे. आमदार डॉ.बाबासाहेब देशमुख यांच्या पुढाकाराने झालेल्या या बैठकीत मुख्य अभियंत्यांकडून पाणी सोडण्याचे आश्वासन मिळाल्याने शेतकऱ्यांच्या अपेक्षा उंचावल्या आहेत. मात्र, बैठकीतील आश्वासन प्रत्यक्ष पाणी कधी येणार, याकडे शेतकरी वर्गाचे लक्ष लागले आहे.